Dialog Film Jawa

Nyoba Gawe Dialog Film

“Limalas Ewu”

Sebuah drama modern pendek berbahasa Jawa yang menceritakan kisah seorang anak yang masih duduk dibangku sekolah dasar, Ibunya meninggal dunia saat ia masih bayi dikarenakan sakit yang dideritanya. Dimasa pertumbuhannya, ia hanya tinggal bersama Bapak dan pengasuh setelah Ibunya meninggal dunia.

Prolog

Tempat            : Ruang Kantor

Waktu                         : Malam Hari

Gambaran aktivitas seorang Bapak diruang kerja sebelum pulang (Tanpa Dialog)

Adegan I

Tempat            : Ruang Tamu

Waktu             : Malam Hari

Suasana           : Tenang

(Reyhan lungguh kursi ngenteni Bapake sing durung bali-bali anggone kerja, sinambi nyawang jam sing cumanthol ana tembok wis meruhi wanci jam sanga luwih limalas menit wengi)

(Mbok Sumi nyedhaki Reyhan)

Mbok Sumi	:	Dhik . . . Dhik Reyhan kok dereng bobok? Nembe napa? Mpun dalu lhooo, ayo bobok.
Reyhan	:	Aku ngenteni Bapak mantuk Mbok, boboke mengko nak Bapak wis mantuk saka kerja.
Mbok Sumi	:	Nanging iki mpun dalu lho Dhik . . . mengko nak malah didukani Bapak piye?
Reyhan	:	Ben Mbok, pokoke aku arep ngenteni Bapak mantuk. Aku emoh bobok sakdurunge Bapak mantuk.
Mbok Sumi	:	Lhooo kok ngoten, boten pareng ngoten ta . . . Sisuk Dhik Reyhan kudu budhal sekolah isuk lho, nak telat piye jal?
(Bapake Reyhan bali saka kerja buka lawang lan uluk salam)
Bapak	:	Assalamu’alaikum . . .
Reyhan, Mbok Sumi	:	Waalaikumsalam . . .
(Reyhan mlayu nututi terus ngrangkul Bapake)
Reyhan	:	Pak . . . Bapak kok nembe mantuk?
Bapak	:	Iya, mau Bapak nak kantor akeh sing kudu diayahi. Dhik Reyhan kok durung bobok?
Mbok Sumi	:	Reyhan kala wau sampun kula aturi enggal bobok, nanging boten purun, amargi mature badhe nengga panjenengan kondur, ngoten.
Reyhan	:	Pak . . . Reyhan dikancani bobok ya? Terus dicritakna dongeng nak buku sing wingi ditumbas, ya Pak?
Bapak	:	Bapak kesel Dhik, karo Mbok Sumi wae ya?
Reyhan	:	Emoh . . . Reyhan pingine karo Bapak, pokoke karo Bapak.
Bapak	:	(Rada nesu lan sora) Rak sah nakal, Bapak ki kesel banget, kana ndang bobok ! ! ! ! !
Mbok Sumi	:	(ngampiri terus nggendhong Reyhan sing praupane kuciwa) Ayo Dhik bobok karo si Mbok . . .

Adegan II

Tempat            : Gerbang Sekolahan

Waktu             : Siang Hari

Suasana           : Sedih

(Tanpa Dilaog)

(Reyhan sing nyawang kanca-kancane bali sekolah padha dijemput Bapake dadi sedih merga dheweke ora tau dijemput Bapake nanging Mbok Sumi ya kuwi sing ngemong dheweke wiwit cilik sakwise Ibune seda)

Mbok Sumi	:	Ayo mantuk Dhik,
Reyhan	:	Iya Mbok, Bapak endi Mbok?
Mbok Sumi	:	Bapak isih kerja ta Dhik, yo mantuk . . . .

Adegan III

Tempat            : Teras Rumah

Waktu             : Pagi Hari

Suasana           : Kecewa

(Reyhan isuk-isuk nyemir sepatune Bapake terus diaturna pas Bapake arep budal kerja)

Reyhan	:	Pak, iki sepatune Bapak wis tak semirna.
Bapak	:	Iya Dhik, kene Bapak ageme.

(Sakwise ngaturna sepatu, Reyhan mlayu menyang mburi karepe jupukna wedhang teh kanggo Bapake, nanging nalika dheweke tekan ngarep meneh Bapake wis budhal kerja)

Adegan IV

Tempat            : Kamar Reyhan

Waktu             : Malam Hari

Suasana           : Mengharukan

(Reyhan nyawang lan jupuk foto bareng kaluwargane sing ana dhuwur meja sisih amben kasure, terus dirangkul kanthi praupan sedih. Bapake Reyhan mlebu kamar)

Bapak	:	Dhik Reyhan kok durung bobok ngapa?
Reyhan	:	Reyhan kangen Ibu Pak,
Bapak	:	Kok ujug-ujug kangen Ibu ki ngapa Dhik?
Reyhan	:	Reyhan ngrasa sepi Pak, nak omah kene gak ana sing isa dijak dolanan.
Bapak	:	Kan ana Mbok Sumi ta Dhik?
Reyhan	:	Tapi Dhik Rethan pingine karo Bapak apa Ibu kok,
Bapak	:	Bapak kan kerja Dhik, Ibu nembe kesah, wangsule dangu.
Reyhan	:	Bapak kok kerja terus ki ngapa ta? Reyhan kan dadi gak isa dolanan karo Bapak.
Bapak	:	Bapak kerja kan golekna sangu Dhik Reyhan nggo sekolah.
Reyhan	:	Bapak nak kerja ki intuk dhuwit pira ta Pak?
Bapak	:	Lha ngapa ta Dhik? Reyhan ndang bobok wae ya,
Reyhan	:	Gak papa, kira-kira sak jam ki pira Pak? Reyhan bobok nak Bapak wis mangsuli.
Bapak	:	(Jawab sak ketemune karepe Reyhan ben ndang turu) sak jame kira-kira ya limalas ewu, wis ndang bobok.
Reyhan	:	Ooo . . . limalas ewu ta, (terus Reyhan mapan turu kanthi foto sing isih digoceki lan dirangkul)
(Nalika Reyhan wis taneg anggone turu, Bapake isih nak sisihe lan nyawang kanthi praupan bingung, napa kok Reyhan nganti isa takon dheweke kerja kuwi intuk dhuwit pira. Sajroning bingung dheweke terus jupuk foto sing isih dirangkul Reyhan nyawang sedela terus didokokna maneh ana meja. Dheweke terus mateni lampu kamare Reyhan lan metu)

Adegan V

Tempat            : Sekolahan

Waktu             : Siang Hari

Suasana           : Bingung

(Tanpa Dialog)

Ø  Reyhan lagi lungguh ana ngisor wit sinambi nyawang kanca-kancane sing lagi padha jajan

Ø  Reyhan jupuk duwit ana sak katoke lan disawang kanthi mikar-mikir terus dilebokna maneh menyang sak

Ø  Reyhan ngombe banyu gawan saka omah sing diwadhahi botol sinambi nyawang wong dodolan somay sing katon rame dirubung kanca-kancane

Adegan VI

Tempat            : Rumah

Waktu             : Siang Hari

Suasana           : Semangat

Ø  Reyhan mlebu ngomah kanthi mlayu terus mlebu kamar jupuk toples ana ngisor bantale

Ø  Toples dibukak terus dieting dhuwit sing ana jerone toples (Mbok Sumi teka arep ndulang Reyhan mangan awan)

Ø  Sinambi mangan Reyhan takon Mbok Sumi

Reyhan	:	Mbok, umpama aku nabung supaya Bapak ora kerja terus piye ya?
Mbok Sumi	:	Nabung?
Reyhan	:	Iya Mbok, ben aku isa karo Bapak.
Mbok Sumi	:	Lha Dhik Reyhan arep nabung artane saking pundi?
Reyhan	:	Saka sangu sekolah ta Mbok,
Mbok Sumi	:	Sangu sekolahe Dhik Reyhan kan ya saka asil kerjane Bapak.
Reyhan	:	Ben, pokoke aku arep nabung supaya bapak ora terus-terusan kerja.
Mbok Sumi	:	(praupan bingung)

Adegan VII

Tempat            : Ruang Tamu

Waktu             : Malam Hari

Suasana           : Gelisah

(Reyhan ngenteni Bapake bali saka kerja sinambi nyawang jam sing wis meruhi wanci sanga luwih limalas wengi Bapake durung bali-bali saka kerjane. Rada sakantawis Bapake bukak  lawang bali saka kerja lan salam, Reyhan terus mlayu menyang Bapake)

Reyhan	:	Pak, Bapak kok mantuke wengi terus ta? Reyhan kan pingin crita karo Bapak.
Bapak	:	Bapak kan kerja Dhik, kerjakane mau nak kantor kana akeh banget dadi baline rada wengi.
Reyhan	:	Tapi mosok bendina Pak, Oiya . . . Reyhan nyuwun arta intuk Pak?
Bapak	:	Nyuwun arta arep nggo apa?
Reyhan	:	(merga wedi konangan nak arep dicelengi dheweke jaluk dhuwit alesane arep nggo jajan) Dhik Reyhan jajan nak sekolahan artane kurang Pak.
Bapak	:	Hayooo, ten sekolahan boten pareng jajan kathah-kathah, mengko  mundhak ora sida sinau. Boten pareng ! ! !
Reyhan	:	(ngrayu) Nyuwun artane ta Pak . . .
Bapak	:	Bapak kesel Dhik, aja ngganggu sik ya.
Reyhan	:	Nyuwun arta . . .
Bapak	:	(nyentak) Dhik Rehan ! ! ! Ora pareng nakal, kana ndang bobok.
(Reyhan mlayu mlebu kamar karo nangis)

Adegan VIII

Tempat            : Kamar Reyhan

Waktu             : Siang Hari

Suasana           : Penasaran

(Reyhan nglebokna dhuwit recehan ana toples permen sing didadekna wadhah nyimpen dhuwit tabungane)

Satu bulan kemudian . . . . .

(Reyhan bukak toples celengane terus ngitung dhuwit sing ana jerone, diitung wis genep nglumpuk limalas ewu, dheweke seneng banget)

Adegan IX

Tempat            : Kamar Reyhan

Waktu             : Malam Hari

Suasana           : Mengharukan

(Reyhan lungguh ana pinggiran kasur sinambi ngrangkul foto kaluwargane lan dhuwit receh limalas ewu sing wis kasil diklumpukna, Bapake mlebu kamare)

Bapak	:	Dhik . . . Dhik Reyhan, mpun bobok? (mlebu kamar)
Reyhan	:	Dereng Pak,
Bapak	:	Lha nembe ngapa? Kok ngrangkul foto malih, kangen Ibu?
Reyhan	:	(ngelungna dhuwit recehan) Pak, iki kanggo Bapak.
Bapak	:	(sajak bingung) iki apa Dhik? Kok intuk dhuwit akeh banget iki saka ngendi?
Reyhan	:	Kuwi kanggo Bapak, saka dhuwit jajanku sing tak tabung sak sowene iki.
Bapak	:	Lha terus iki kudu Bapak apakna?
Reyhan	:	Dhuwit kuwi kanggo Bapak supaya Bapak ora kerja terus, supaya Bapak dhuwe wektu kanggo Reyhan, supaya Bapak isa dolanan karo Reyhan, isa crita dongeng sakdurunge Reyhan bobok, terus liya-liyane.
Bapak	:	(tambah bingung) piye ta Dhik?
Reyhan	:	Wingi kae kan Bapak tau crita nak Bapak kerja kuwi intuke dhuwit limalas ewu, lha iki Reyhan nabung intuk limalas ewu supaya Bapak ora kerja terus lan duwe wektu longgar kanggo Reyhan. Reyhan pingin kaya kanca-kancane Reyhan Pak, sing isa nak endi-ngendi karo Bapake. Reyhan uga ya kangen Ibu . . . .
Bapak	:	(ngrasa nyesel lan bayangna lakon kang wus kawuri nalika Reyhan isih cilik lan Ibune nggendhong dheweke kanthi gegojegan bebarengan. Nalika Ibune nitipna Reyhan merga vonis kanker paru-paru stadium akhir sing ditampa dening Ibune lan wusanane jalari seda. Bayangna olehe nyeneni Reyhan nalika jaluk dheweke ngancani Reyhan turu lan liya-liyane.) (Reyhan dirangkul lan luh mili)

Iki durung rampung lan isih orek-orekan, sumangga kanca-kanca katuran ngoreksi, nuwun . . .

J J J