Bimalukar, Sumbere Kali Serayu

Nggambarena rupane wong wadon sing ayu, mulane diarani Serayu. Yakuwe salah sijine kali sing ana nang tlatah Banjarnegara. Sing dawane ngaler-aler dawa banget dewiwiti sekang tuke sing ana nang Pegunungan Dieng lan joge ana nang Segara Kidul.

Miturut dongeng sing wis kuncara, Kali Serayu kuwe kadadeyan saka pegaweyane Raden Werkudara utawa Bimasena, yakuwe panengahe Pendhawa lima sing ngratoni Negara Jodhipati. Cerita dumadine Kali Serayu demolai sekang anane Priyagung sing asmane Prabu Trembugu. Prabu Trembugu duwe putra pitu, wadon loro lan liyane lanang kabeh. Aran putrane  Prabu Trembugu sing putri yaiku Dewi Arimba karo Dewi Arimbi. Seliyane sing wadon-wadon mau, Prabu Trembugu uga duwe putra sing lanang-lanang cacah lima sing asmane Braja Denta, Braja Musti, Braja Wikalpa, Braja Lamatan, karo Kala Bendana.

Putrine wadon sing aran Dewi Arimbi pancen wis katon diwasa, ora depaido rupane mesthi ayu banget, mergane Prabu Trembugu wis kuncara bagus rupane lan gagah dedege, seliyane kuwe garwane uga ayune mothor-mothor ora bisa diselaki, jan ora nana sing bisa nandhingi.

Weruh putrine sing wis keton diwasa mau, Sang Prabu Trembugu katon krasa kepengin duweni wayah saka putrine sing arane Dewi Arimbi. Nanging panjenengane krasa bingung sapa sing arep dedhaupena karo putri wadon nomer lorone mau. Prabu Trembugu sajake bingung kepriwe anggone nggoletena bahan bojo nggo anak wadone mau, ya Dewi Arimbi kuwe. Mula nganakake wara-wara kanggo wong-wong ing negarane yen dheweke lagi golet bojo kanggo anak wadone.

Pawarta kuwe mau senalika ora mung nyebar nang negarane nanging malah tekan maring pirang-pirang negara. Pancen rupane  Dewi Arimbi sing ayu banget kaya wernane kembang mawar sing abange mothor-mothor, mula akeh sing melik maring Dewi Arimbi. Siji mbaka siji satriya sekang negarane lan sekang negara-negara sekubenge padha teka maring kadipatene Prabu Trembugu, ya ora liya padha duweni niyat arep nglamar lan nggarwa Dewi Arimbi. Amarga keton mbludag satriya-satriya sing melik lan duwe niyat nggarwa Dewi Arimbi, Prabu Trembugu katon bingung sapa sing arep depilih.

Prabu Trembugu molai mikir-mikir, kepriwe carane olehe milih priyagung sapa sing arep didadekena sisihane putrine, ya Dewi Arimbi mau. Suwening-suwe, Prabu Trembugu duwe pikiran arep mertapa kanggo golet pitudhuh sapa kira-kira sing pantes lan cocog nggo dedadekena sisihane Dewi Arimbi. Nuli Prabu Trembugu lunga golet panggonan mertapa sing sepi karo adoh sekang gebyare dunya.

Sewise mlaku sedawan-dawane dalan Prabu Trembugu nemu panggonan sing krasa pas lan cocog. Prabu Trembugu nuli mlebu maring panggonan mertapa mau, ora nten-ntenan Prabu Trembugu nuli bae sila lan nyenyuwun maring ngarsane Dewa supaya diwei pitudhuh priyagung sapa sing kudu dheweke pilih kanggo Putrine, Arimbi. Nang atine Prabu Trembugu celathu,

“Dhuh Dewa sing Maha Welas tur Asih, putriku wadon siji wis katon diwasa lan pantes mbangun umah-umah. Nanging insun koh sajake bingung, kepriwe becike anggonku golek bojo kanggo anakku Gusti”.

Senalike kuwe ana swara seru tur medeni nyemauri dongane Prabu Trembugu sajerone tapa mau. Swara mau mengkene monine,

“Trembugu !!”

“Ora susah degawe bingung!”

“Sliramu jan-jane wis ngerti sapa sing bakal dadi bojo sekang anakmu wadon, Arimbi.”

Prabu Trembugu katon kebingungen karo praupane katon wedi banget, kaya-kaya nembe tau menawa Prabu Trembugu katon wedi nganti kaya kae rupane. Senajan wedi, Prabu Trembugu nuli nyemauri swara gedhe nur medeni mau.

“La la, lha sapa kuwe wonge?”

“Mbok deparingana pitudhuh supaya ingsun bisa nemokena calon sing cocog karo anakku Arimbi”.

“Gaweya sayembara....!”. Semaure suara mau.

“Sayembara kaya ngapa sing panjenengan maksud kuwe, ingsun ora patiya genah maksud penjenengan”. Prabu Trembugu celathu.

Kanthi swara sing saya lirih lan suwe suwe ngilang, swara mau semaur ngenani sayembara sing kena dinggo milih sapa priyagung lanang sing cocog lan pantes karo Dewi Arimbi.

“Gawenana sayembara kaya mengkene. “Sapa wonge sing bisa gawe kali saka tengah-tengahing pulo Jawa, pol dununge nang Segara Kidul bakal tak dadekena bojo kanggo anakku wadon Dewi Arimbi”.

Krungu celathune swara mau, Prabu Trembugu tambah katon bingung praupane. Nuli celathu nang atine.

“Ee lah dalah, koh kayane sayembarane angel temen ya?. Apa kira-kira ana sing bisa nglakoni sayembara mau?”

Sangking bingunge, Prabu Trembugu lekas bali bae maring umahe. Nuli ngudarasa karo garwane.

“Yayi, kepriwe kiye olehe awake dhewek milih calon garwa kanggo Arimbi?”. Celathune Prabu Trembugu.

Inkang garwa nyemauri. “Hambok bilih panjenengan sampun pikantuk pitedhah saka Dewa kakang?.

“Wis yayi, pancen wis. Nanging koh pithudhuh sing diwenehi Dewa mau keprungu angel lakune yayi”. Wangsulane Prabu Trembugu nyambi katon bingung banget.

Garwane nyemauri kanthi nggawe dedege atine Prabu Trembugu. “Boten dados menapa kakang, menika wau menika dhawuhipun dewa, masti mawon leres lan saged dipunlampahi kakang”.

Amarga krungu ature garwane mau, Prabu Trembugu nuli bae gawe pengumuman sing monine padha persis karo apa sing diomongena swara sing keprungu ana nang pertapan mau.

 “Sing sapa wonge bisa nggawe kali sing apik, bening, nglaler ngidul joge nang segara kidul bakal tak jodhokena karo anakku Arimbi”. Kaya kuwe ngendikane Prabu Trembugu.

            Sawise keprungu warta mau, akeh satriya sing maune melu ndaftar kanggo sayembara nggarwa Dewi Arimbi mundur ora sida melu sayembara. Mergane sayembara katon abot timbange. Mung ana rong satriya sing egun tetep ngotot kanggo melu sayembara mau. Wong loron kuwe mau pancene wis sembarang gemiyen padha kuwate ya padha digdayane. Satriya-satriya mau yakuwe Bima sing dadi penengahe Pendhawa karo Duryudana dalah sijine Kurawa sing bengis karo sipate sing adigang adigung adiguna, dheweke bakal nglakokena kabeh cara supayane bisa mboyong Dewi Arimbi maring Ngastina.

Sauwise sekang rembugan ngenani anane lomba gawe kali mau, rong keluwarga mau padha bali maring kratone dhewek-dhewek, perlune nggo ngrembug cara sing ampuh kepriwe olehe padha gawe kali ben cepet dadi tur apik kasile.

Para Pendhawa salah sijine ya Bima nuli diprentah dening tetuane Pendhawa yakuwe Puntadewa kon padha lunga sekang kratone prelune padha tapa brata semedhi nyenyuwun maring ngarsane Dewa sing Maha Welas Asih, ben diwei pitudhuh kepriwe kareben olih pitudhuh kepriwe olehe gawe kali, molaine sekang ngendi lan nyenyuwun pitulungan lancar anggone gawe kali.

Nuli bae Bima lunga sekang Kratone tumuju sukune Gunung Dieng kanggo nglakokena apa sing deprentahena Puntadewa.

Amarga wedi kesaingan lan kalah karo para Pendhawa, Duryudana prentah maring balane supaya nginggeng maring Para Pendhawa, apa sing lagi dilakokena. Seliayane kuwe, utusane uga kon ndeleng lepriwe carane Pendhawa nggone gawe kali.

Supayane ora kewenangan, Bala Kurawa sing diutus nuli digawe rupa kethek. Dheweke padha nginggeng, nututi nuli mburu maring ngendi lakune para Pendhawa. Sewise weruh menawa Para Pendhawa ora age-age gawe kali malah tapa brata nang Sukune Gunung Dieng, utusane Duryudana nuli bali. Sebaline sekang Gunung Dieng, langsung bae lapur maring Duryudana apa sing diweruhi nalikane nginthili Para Pendhawa.

“Paduka Duryudana, para Pendhawa boten lajeng ndamel lepen paduka, nanging samenika tesih sami tapa wonten sukuning Gunung Dieng.”

Krungu lapuran sekang utusane yen Para Pendhawa lagi padha tapa brata, ajamaning tiron tapa brata, para Kurawa langsung bae molai gawe kali. Pikirane Kurawa sing molai dhisit mesthi dadine uga mesthi dhisit. Aja maning kemutan ndonga sedurunge miwiti nggone padha nggaweni kali mau. Terus bae padha temandang gawe nggarap kali sing nggo lomba karo Pendhawa. Mbuh apa bae sing ana dinggo ndhudhuki lemah. Sing penting bisa dadi kali sing gedhe. Mbuh nganggo gejig, pacul, bendho, arit lan apa bae sing ana pokoke padha denggo.

Celathune Duryudana sing rupane raseksa gedhe dhuwur tur medeni kaya mengkene,

“Ayo bala kurawa!”

“Tangiya, tumandangana pegaweyanku gawe kali tekan Segara Kidul. Supayane prabumu kiye bisa mboyong Arimbi sing sulistya wernane!”

“Ha ha ha ha....”

Keprungu prentah kaya mengkono, bala kurawa nili tumandang gawe molai anggone nggaweni kali.

Sebab akeh balane, mulane Kurawa sewektune sewulan bae kaline wis keton dawa banget ngaler-aler kasile njujug maring Segara Kidul. Pase, kali sing digawe nang bala Kurawa wis tekan Jatirokeh. Salah sijine papan sing nang jaman siki ana nang kabupaten Banyumas.

Meruhi kedadeyan sing kaya mengkono, Petruk karo Gareng padha klimpungan karo bingung atine merga kali gaweyane Kurawa wis meh tekan Segara Kidul.

Gareng nuli celathu maring Petruk.

“E lah dalah. Truk kiye si kepriwe ceritane?. Deneng si baka kurawa nggone gawe kali wis dawa temen?. Bisa-bisa kiye mengko bendarane awake dhewek kalah olehe sayembara nggawe kali.

“Iya koh Reng Gareng, kiye si arep kepriwe larah-larahane?. Bendarane awake dhewek mesthi isin karo para Dewa yen kalah olehe melu sayembara. Terus kiye arep kepriwe Reng Gareng?”. Semaure Petruk.

“Mayuh!. Awake dhewek siki padha lapur maring bendara Pendhawa. Arep kepriwe olehe padha nusul pegaweyane Bala Kurawa sing olehe nggaweni kali wis meh njujug tekan Segara Kidul”. Sambunge Gareng.

“Mayuh mayuh”.

Petruk karo Gareng terus padha temuju maring kratone para Pandhawa. Nanging sepira kagete meruhi nek para Pandhawa malah ora sijiya sing ana nang kraton. Mula nggawe banget bingunge Gareng karo Petruk.

Amarga bingung, Petruk karo Gareng takon maring bala-bala sing ana nang kratone para Pandhawa. Takone mengkene,

“Heh prajurit, ko padha weruh maring ngendi tindake bendara-bendarane awake dhewek sesuwene kiye?”.

“Sengertiku, bendara Pandhawa lima pada tumuju ana sukune Gunung Dhieng Truk, Reng. Perlune padha tapa nyenyuwun maring dewa, kepriwe olehe arep miwiti anggone gawe kali”. Semaure prajurit kraton.

“Owalah kaya kuwe ceritane, ya wis mayuh Reng!. Awake dhewek nusul maring Gunung Dieng”. Celathune Petruk karo nesu-nesu.

Sauwise tekan sukune Gunung Dieng, Punakawan loro kuwe sengsaya bingung bareng weruh bendarane ya Pendhawa lima mau egun padha ngleker tapa brata kabeh, khusuk semedhi nang Gunung Dieng sing anyes jejes hawane. Punakawan loro padha ngorong-ngorong,

 “Bendara, wungu lah, si kepriwe deneng padha tapa bae ora wungu-wungu!  Kae lho Kurawa wis meh rampung nggone gawe kali. Ora wurung mengko kalah cepet olehe gawe kali. Ya tegese kalah olehe sayembara. Merga kali mau mbokan sarate menang sayembara?. Ndara Bima, wungu lah!”. Kaya kuwe ngorong-ngoronge Petruk karo Gareng.

Nanging bendarane padha meneng bae ora ana sing tangi apamaning mangsuli omongane Petruk karo Gareng.

Dienteni sedina sewengi nganti wetenge padha kengelihen bendarane tetep bae ora padha tangi, mulane padha metu akale. Petruk mbedhul wulu cumbu sing ana nang jempol sikile Bimasena. Bareng rambute debedhul, Bimasena tangi gregah karo ngereng-ngereng kelaranen. Bareng kucek-kucek mripat, keton Petruk karo Gareng lagi padha ndhepepes keweden, banjur ditendhang nganti padha krungkeb. Mesthi bae Punakawan loro padha nangis nggerung-nggerung kelaranen nganti nangikna para Pendhawa liyane, yakuwe Puntadewa, Harjuna, Nakula karo Sadewa.

“Ana apa kiye, deneng padha tangisan nggerung-nggerung kaya wong dikaniyaya. Wis menenga!. Aja gawe rusuhing pertapan Gunung Dhieng kiye. Mundhak kena bendu kowe-kowe padha”. Swarane Harjuna karo swarane sing alus nentremena ati.

Bareng wis temata kabeh, Petruk karo Gareng padha nyeritakna apa sing wis deweruhi neng Punakawan loro mau. Ngenani wis meh dadine kali sing digawe nang para Kurawa, jan wis ngaler-aler dawa banget. Ora salah nek ora age-age demolai para Pendhawa mesthi kalah olehe lomba gawe kali. Mulane bendarane padha diaturi kon leren nggone tapa brata. Ora kur isin karo Kurawa nek kalah, tapi ya banget isine karo para dewa.

Kaya mengkene lapurane Petruk karo Gareng.

“Bendara, mbok panjenengan sami ampun namung tapa kemawon, mbok langkung sae menawi enggal-enggal dipundamel menika lepen. Amarga Bala Kurawa sampun dumugi Jatirokeh, sekedhap malih njujug dugi wonten Segara Kidul ndara”. Kandhane Petruk.

“Inggih ndara Pandhawa, kelawan bala ingkang ewon cacahe, anggenipun damel lepen Kurawa enggal sanget. Menawi mboten enggal-enggal panjenengan wiwiti, mesthi mawon para bendara badhe kalah anggenipun ndherek sayembara”. Gareng nyauri.

Bareng krungu kedadeyan kaya mengkana, para Pendhawa padha mikir kepriwe anggone arep miwiti nggone gawe kali. Semar sing dadi kesepuhane para Pendhawa dijaluki petwuah nang para Pendhawa.

“Dhuh kiyai Semar, miturut panjenengan sinten ingkang langkung panter supados damel lepenipun kiyai?, ugi kados pundi anggenipun seged damel lepen kala wau supados mboten ketingal biasa kemawon kiyai?”. Celathune Nakula sing katon bingung.

Nuli Semar ngwei petudhuh supaya sing gawe kali kon Bimasena bae, sing genah kesektene karo bregas awake. Seliane kuwe nggon egawe kali mau dikon aja nganggo perkakas sing biasa kaya sing denggo nang para Kurawa sing rupane pacul karo gejig, nanging Semar paring pitudhuh kon nggone gawe kali nganggo linggane Bimasena. Krungu perkara sing kaya mengkono sing ana nang sandhinge Semar karo Bimasena yakuwe ana tunggal-tunggale para Pendhawa uga ana Petruk karo Gareng senalika kuwe padha gumun.

Wis krungu ngendikane Kiyai Semar kaya kuwe, Bima nuli mikir ana ngendi becike olehe miwiti nggawe kaline. Dheweke nuli kemutan menawa nang senjerone tapa, ana pitudhuh supaya olehe nggawe kali dewiwiti sekang sijine panggonan ana nang sengingsore papan tapane para Pendhawa. Kiyai Semar nuli nggawa Bima tumuju maring panggonan sing kira-kirane Bima mau cocog nggo miwiti gawe kali mau. Bareng wis tekan, Kiyai Semar dijaluk pithudhuhe apa panggonan mau cocog miwiti gawe kali. Nuli Kiyai Semar ngestokaken. Senalika kuwe Bimasena nuli ngestokaken Pituture Kiyai Semar terus nglukar sandhangane. Amarga kemutan maring ayune Dewi Arimbi, Bimasena urip linggane, sing maune biasa-biasa bae, sauwise tapa dadi katon landhep kaya dene wluku. Bareng kaya kuwe, Bima terus mlaku nglarak linggane mau, ya perlune supaya dadi olehe gawe kali. Bimasena mlaku ngulon terus sangkane, nuli dibablasaken maring ngidul, tujune ora liya ya mung maring Segara Kidul. Kedadeyan kuwe nandhani anane saingan antarane Pendhawa karo Kurawa. Sing lagi padha adu kekuwatan sapa sing paling cepet nggone gawe kali.

Temenan, pancene pitudhuhe Semar ora mblenjani. Bareng Bima mlaku blas ora nana sing wani ngganggu dheweke. Sebabe sapa bae wis padha ngerti angger Bimasena kuwe satriya sing sekti mandraguna. Sapa baes ing wani ngganggu bakal disingkirena kaya paribasan rawe-rawe rantas malang-malang putung. Siji-sijine sing wani ngganggu yakuwe kur kewan yuyu. Yuyu mau nyapiti sukune Bima nganti padha ledhes. Amarga Bima gregeten, nuli ngetokena aji-ajine yakuwe Kuku Pancanaka, terus bae yuyu-yuyu mau depithesi nganti padha mati tekan ora padha wani ngganggu maning. Mulane nganti seprene yuyu sawah nang awake ana pinggetane, ya kuwe sing njalari merga pithesane Bima.

Bareng wis patang puluh dina, temenan Bima rampung nggone gawe kali tekan Segara Kidul, wis krasa olehe gawe kali apik rupane, Bima langsung bae bali menyang kratone. Nang papan liyane, Ppra Kurawa sing wis molai dhisit nggone gawe kali malah ora tutug tekan Segara Kidul olehe gawe kali. Malah nganti Kurawa duwe pikiran sing ora apik, yakuwe kali gaweyane dheweke disambungna karo kali sing digawe Bima sing wis rampung tekan segara kidul. Ancase ya mung supaya dheweke deanggep rampung olehe gawe kali lan bisa mboyong Dewi Arimbi. Nanging perkara mau dingerteni nang Prabu Trembugu, mula Duryudana tetep dianggep kalah olehe melu sayembara.

Kali sing digawe Kurawa rupane jan ora karuwan, banyune buthek terus kaya miline banyu nggawani awu. Mulane diarani kali Merawu, ya sekang cekakane kali sing memper awu. Kebalikane kali sing digawe nang Kurawa, kali sing digawe Bima rupa banyune bening, resik, karo ora nana kotorane. Ibarate angger diomongena kaya rupane bocah wadon sing ayu. Merga dadine kali mau jalaran tersire Bima karo wong wadon sing ayu, mula saka kuwe kali sing digawe nang Bima diarani kali Serayu, ya cekakan saka teksir maring wong ayu.

Seliyane kuwe, panggonan sing dienggo Bima ngudhari klambine mau, sing panggonane nang Gunung Dieng diarani Bimalukar. Aran kuwe dejuput merga nang panggonan mau Bima nglukar sandhangane kanggo miwiti nggone gawe kali nganggo linggane sing gedhe, dawa tur landhep.

            Bareng Prabu Trembugu semerep kali sing digawe nang Bima apik rupane, bening, tujune ya bener maring segar kidul, mulane Bima sing dipilih Prabu Trembugu kanggo nggarwa Dewi Arimbi.

            Pungkasane Bima dijodhokena karo Dewi Arimbi lan didadekake nata nang Pringgondani.