Contoh Panyandra

CANDRA WINISUDA KRIDHAMADU KAPING V

Punurwaka prabaning pradangga, pra tamtama asung laju lumampah.

Om, astungkara sidham. Om, sembah puja brata. Sembah sukma, sembah rasa, sembah rasa, sembah raga, dalah sembah suksma. Kabeh sumandha haneng tata yuwana. Datan mangro marang atunggal, datan onjo marang kadurjanan. Gendhing pangiring minangka pepadhanging kalbu, saguh hanggelar pepadhanging jagad, kabagyan, dalah karaharjaning gesang.

Dhampyak lumampah kadi cahya ngalumpuk, inten galindhing ingkang coplok saking embanan. inggih dhasaring para siswa hingkang luhur ing pawiyatan, limpad ing pasrawungan, miwah lulus sking tata tataning pakumpulan sastra, pakumpulan gendhing, miwah basa ing pawiyatan kridhamadu. Siswa wasis ingkang sampun saguh, gupuh, lungguh aneng sasra pamawas, sewu pamikir. Muga dadosa pepunta-puntaning madeg budayaning bangsa Jawi.

Rep.... sidhem premanen, datan hana walang kang suka tetembangan, amung kridhaning para pradangga ingkang kesdu mangolah kridha maweh raharja rahayu rampaking adicara. Muga ingsun datan kumingsun. Hamung hangulad candra tinon angganipun para sarjana kadi banjaraning bathara ingkang tumedhak saking kahywangan sapta arga.

Sapecak mangu sapecak kendel, sajangkah owah saobah gagah myak warana enggal minangka panata cara, pamedhar sabdaning sesorah, miwah paniti larasing basa. Mugi sedaya ingkang mentas saking kawah candramuka, inggih kawah warananing ngelmu dadosa ngelmu ingkang tumata lan tumama tumram sipat, laku ing lampahing para siswa. Tri tunggal mulya kinastha minangka sangkalaning pepunta miwah mijiling para sarjana, mugi anjalari margi adi gancaring pamanggih.

Minggah aneng sitinggi, tinonton, tinunu dening sagung warga wardaya ingkang samya hanekseni. Mugi kesdu paring pangestu dhumateng para winisuda. Sineksenan mring asal pribadi mring tata kalenggahan setunggal-setunggalipun, mugi para siswa pinaringan daya kekiyatan hangayahi jejibahan ingkang sumandhing.

Nalika semana, para sarjana sampun samekta kawinisuda.